Tuesday, 05 March 2024, 09:08:12 am
پاکستان کا اقوام متحدہ سے فلسطین میں اسرائیل کے مظالم کی تحقیقات کا مطالبہ
November 29, 2023

اقوام متحدہ میں پاکستان کے قائم مقام نمائندے عثمان اقبال جدون نے فلسطین میں اسرائیل کے سنگین جرائم کی تحقیقات کیلئے جنرل اسمبلی اور سلامتی کونسل سے احتساب کی ایک خصوصی حکمت عملی تشکیل دینے کا مطالبہ کیا ہے۔

فلسطین کے بارے میں سوال پر اقوام متحدہ کی جنرل اسمبلی میں بحث میں حصہ لیتے ہوئے سفیر عثمان اقبال جدون نے غزہ کی پٹی اور مغربی کنارے میں فلسطینی شہریوں کے تحفظ کیلئے بین الاقوامی حفاظتی فوج تعینات کرنے اور امن عمل کی بحالی کیلئے اپنا کردار ادا کرنے کا مطالبہ کیا۔

انہوں نے اسرائیل کی جانب سے طاقت کے بلا امتیاز استعمال کی مذمت کی انہوں نے کہا کہ اسرائیل کے فلسطینی شہریوں پر حملے بین الاقوامی انسانی حقوق کی صریحاً خلاف ورزی اور جنگی جرائم کے مترادف ہیں۔

سفیر نے قطر اور مصر کی جانب سے قیمتی جانوں کے تحفظ کی کوششوں کو سراہا تاہم اس حوالے سے پاکستان کا موقف تنازعے کے مکمل اور فوری خاتمے کے حق میں ہے۔