وزیر خزانہ محمد اورنگزیب نے ایشین انفراسٹرکچر انوسٹمنٹ بینک کو پاکستان کے بنیادی ڈھانچے کی ترجیحات اور سٹریٹجک ترقی پر خصوصی توجہ کے ساتھ اپنی ترجیحات کو ہم آہنگ کرنے کی دعوت دی ہے۔

وہ واشنگٹن ڈی سی میں ایشین انفراسٹرکچر انویسٹمنٹ بینک کی صدر ZOU JIAYI سے گفتگو کر رہے تھے۔

وزیر خزانہ نے ایشین انفراسٹرکچر انوسٹمنٹ بینک کی جانب سے تقریبا ایک ارب ستر کروڑ ڈالر کی مالی معاونت کے ذریعے فعال تعاون کو سراہا۔ جس میں بینک ایک ارب ڈالر کی اضافی امداد بھی فراہم کرے گا۔

واشنگٹن ڈی سی میں ایس اینڈ پی گلوبل ریٹنگز کے نمائندوں سے ملاقات کے دوران وزیر خزانہ نے کہا کہ پاکستان نے اپنی بیرونی ذمہ داریوں کو بروقت پورا کیا ہے، جس میں رواں ماہ کے دوران اپنے یورو بانڈ کی ایک ارب چالیس کروڑ ڈالر کی ادائیگی بھی شامل ہے۔

انہوں نے ملک کی بیرونی ادائیگیوں کو مزید مستحکم کرنے کے لیے سعودی عرب کی جانب سے اضافی مالی معاونت پر بھی روشنی ڈالی۔

محمد اورنگزیب نے اس اعتماد کا اظہار کیا کہ پاکستان کی بہتر میکرو اکنامک صورتحال اور مسلسل اصلاحات درجہ بندی بہتر بنانے کے لیے ایک مضبوط کیس ہے۔